Det er etablert ein eigen listeforslagsportal der parti og grupper som ønskjer å stille ved kommunestyrevalet 2023, kan underskrive, oppføre listekandidatar og levere listeforslag elektronisk.

Alle parti blir oppmoda til å bruke den nye listeforslagsportalen. Den elektroniske løysinga er oppretta for å gjere prosessen enklare, men følger same regelverk og fungerer på same måte som ved innlevering av lister på papir.

Ved å bruke listeforslagsportalen, vil riktig val, valår og kommune kome opp automatisk på det som blir sendt inn via løysinga.

Her finn de informasjon om korleis bruke den elektroniske listeforslagsportalen.

Om de vel å ikkje bruke listeforslagsportalen, kan listeforslaget bli levert på papir slik som tidlegare.

Her finn du informasjon om, og malar for listeforslag på papir.

Partia må levere listeforslag til kommunen innan 31. mars 2023 kl 1200.

Legg merke til at det er eit krav at forslaget har kome fram til kommunen. Ved elektronisk innlevering er det lett å forhalde seg til dette innleveringstidspunktet. Ved papirinnlevering er det ikkje nok at listeforslaget er poststempla innan fristen dersom de veljer å sende det inn via posten. Vi MÅ ha dei i hende innan fristen.

Lister kan bli levert digitalt eller på papir, eller som ein kombinasjon.

Fysisk innlevering kan berre skje til Sula rådhus. Opningstida er måndag til fredag klokka 08:00 til 15:30. Det er mogleg å avtale levering utanom opningstida, valansvarleg må då bli kontakta på førehand.

Frist for å trekke tilbake eit listeforslag er torsdag 20. april 2023 klokka 12:00. Innlevert listeforslag kan bli kalla tilbake av tillitsutvalet, jf vallova § 6-5.

De finn utfyllande informasjon på valdirektoratet sine nettsider.

Partinamnet som skal bli ført på listeforslaget skal vere det same som er registrert i Partiregisteret; registrert verna partinamn (f.eks. VENSTRE - ikkje Sula VENSTRE)

Regelen for partinamn finn du i vallova § 6-1, andre ledd bokstav b.

Ved kommunestyreval og fylkestingsval skal listeforslaget vere utfylt i rekkefølge med minimum sju kandidatar. Forslaget kan maksimalt innehalde eit tal på kandidatnamn som samsvarer med det talet på representantar som skal veljast til kommunestyret eller fylkestinget, med eit tillegg av inntil seks andre namn. Dette er heimla i vallova § 6-2, andre ledd.

Vi skal velje 29 medlemmar til kommunestyret i Sula. Vallova regulerer derfor at det skal vere minst 7 og maksimalt 35 namn på listeforslaget.

Dersom ein kandidat ikkje er innført i folkeregisteret som busett i Sula når listeforslaget blir innlevert, må det ligge ved ei erklæring frå kandidaten om at vedkomande vil vere valbar på valdagen, altså ha flytta til den kommunen lista skal gjelde for. Denne regelen finn du i vallova § 6-4 bokstav c.

Legg merke til følgande: Dersom listeforslaget skal bli levert inn på papir, må det bli skrive ut to-sidig, slik at signaturen til underskrivar 1 og 2 kjem på baksida. Det er ikkje høve til å levere listeforslaget på to adskilte ark.

Ved kommunestyreval kan eit visst antal av dei øvste kandidatane på listeforslaget bli gitt eit stemmetillegg. Kandidatar med stemmetillegg skal stå først på listeforslaget og med utheva skrift.

Det må også bli levert vedlegg. Desse skal innehalde nokre andre opplysningar enn det som står på sjølve listeforslaget. Oppretting og utfylling av vedlegg vil også vere tilgjengeleg i listeforslagsportalen (aktuelle vedlegg blir automatisk produsert og sendt til kommunen når listeforslaget blir levert elektronisk).

Regelen om vedlegg finn du i vallova § 6-4.

Legg merke til følgande: Listeforslaget skal leverast på papir slik at signaturen til underskrivar 1 og 2 kjem på baksida. Det er ikkje høve til å levere listeforslaget på to adskilte ark.

Kandidatane skal vere oppførte med:

• Fornamn, etternamn og fødselsår
• Kandidaten sin poststad (f.eks. 6037 Eidsnes = Eidsnes)

Dersom forslagsstiller ønsker det, vil ein kunne få kontrollert / sjekka listeforslaget mot manntalet. Då må ein kontakte valsekretariatet i god tid før innleveringsfristen.

Ved å sjekke alle opplysningar knytt til alle føreslåtte kandidatar mot folkeregisteret, vil ein få "vaska bort" det som eventuelt ikkje stemmer med manntalet.

På nettsidene til Valdirektoratet ligg det informasjon om listeforslag, bl.a. om å:

• stille til val
• oppretting / innlevering av listeforslag.

Når listeforslaget er mottatt og kontrollert – og etter at fristen for å trekkje forslaget er ute (20. april) – vil valsekretariatet sende varsel til alle føreslåtte kandidatar med ein kort frist for å eventuelt trekkje kandidaturet sitt.

Når fristen for å be seg fritatt er ute, blir det lagt fram ei sak til valutvalet om endeleg godkjenning av listeforslaget.