Gebyr etter Gebyrregulativ for plan, byggesak og geodata (PDF, 258 kB) blir fakturert av Sula kommune. Betaling kan krevjast før forretning fastsetjast, arbeid vert igangsett eller før vedtak vert fatta. Alle prisar er gitt i norske kroner. Det vert ikkje rekna meirverdiavgift på gebyr etter plan- og bygningslova, matrikkellova eller eigarseksjonslova. Forskrifta speglar det faktiske arbeidet dei ulike sakstypane medfører etter sjølvkostprinsippet.
Dei tidsfristane som gjeld etter matrikkelforskrifta § 18 gjeld ikkje i månadane desember, januar, februar og mars.
Betalingsplikt
Alle som får utført tenester etter dette regulativet skal betale gebyr.
Kommunen krev i tillegg inn tinglysingsgebyr og dokumentavgift i saker der kommunen må forskottera dette. Faktura vert stila til tiltakshavar eller den det vert vist til med fakturaadresse i søknaden.
Tidspunkt for gebyrfastsetting og fakturering
Gebyr vert rekna etter dei satsane som gjeld på tidspunktet fullstendig søknad vert motteke i kommunen, møte er halde, eller etter vedtak er fatta med mindre anna kjem fram av forskrifta. Gebyr etter matrikkellova vert berekna etter dei satsane som gjeld når saka vert fremma, jf. matrikkelforskrifta § 16.
Gebyret forfell til betaling 30 dagar etter fakturadato. Ved for sein betaling vil det tilkome purregebyr etter inkassoforskrifta. Gebyret må betalast og forfell sjølv om vedtaket er klaga på eller det er søkt om reduksjon av gebyr.
Sakkyndig bistand
Der kommunen leiger inn sakkyndig bistand for kontroll, fråsegner, vurderingar ut frå lov- og forskriftskrav og liknande, vil kostnadene for slik bistand bli lagt til gebyret. I tillegg kan det verte fakturert for medgått tid for kommunen sitt arbeid med å hente inn bistand.
Urimeleg gebyr
Gebyret kan verte redusert dersom kommunen etter eiga vurdering vurderer gebyret som klart urimeleg. Kommunen kan delegere vedtaksautoriteten til relevant administrativt nivå. Søknad om redusert gebyr utset ikkje betalingsfristen.
Klage
Når gebyret er heimla i plan- og bygningslova § 33-1, matrikkellova § 32 eller eigarseksjonslova § 15, er det ikkje høve til å klage på gebyret i den enkelte saka.
Enkeltvedtak etter § 1-5 om urimeleg gebyr kan klagast til Statsforvaltaren i Møre og Romsdal etter reglane i forvaltingslova.
Avslag/endring av sakstype
For å etterleva sjølvkostreglane skal det ved vedtak om avslag betalast 100 % av ordinært gebyr. Gebyrbeløp vert ikkje godskrive ved ny eller endra søknad. Dersom søknad om seksjonering vert avslått vert eventuelt innbetalt tinglysningsgebyr tilbakebetalt. Saksarbeidet vert sett på som avslutta dersom det ikkje er sendt klage innan utgangen av klagefristen.
Tinglysingsgebyr og rettsgebyr
Tinglysingsgebyr og rettsgebyr vert regulert frå statleg hald.